زفاف معز مسعود على بسنت نور الدين حديث السوشيال ميديا اليوم.. الشباب: كان "بيكراش" عليها من أربع شهور.. والفتيات: "دلوقتى بقى تعدد الزوجات حلو وفين كلامك عن زوجتك الأولى ووقوفها جنبك طلعت مصطفى أبو حج

هجوم شديد تعرض له الداعية الإسلامى معز مسعود، بعد إعلان زفافه أمس على نجمة السوشيال ميديا والمرشدة السياحية بسنت نور الدين، كون تلك الزيجة تعد الثانية له بالرغم من أحاديثه وإشادته المعتادة بزوجته الأولى، وكيف تحملته فى بداية حياته المهنية ووقوفها بجواره. حفل الزفاف مثل صدمة للعديد من متابعى الداعية الإسلامى، وتحول إلى تريند مواقع التواصل الاجتماعى المختلفة، وكتب محمود يوسف تعليقاً على الزفاف "زواج معز مسعود وبسنت نور الدين، جدعة يا بسنت، ما شاء الله شايف بنات بتبارك وبتهنى وسعيدة، وموضوع الزوجة الثانية بقى جميل وحلو"، بينما قال حساب آخر: "الكراش اتجوز". بينما كتبت إيمان الجندى قائلة: "معز مسعود طلع خليفة مصطفى أبو حجر، شابوه معز مسعود"، وعلقت خلود عوض على زفاف الداعية الإسلامى قائلة: "أنا متابعة معز مسعود من 2008، وكنت مشتركة على المنتدى قبل الفيسبوك والكلام دا، وكنت بتابع لقاءاته وكان دايما يشكر فى مراته وأنها قد إيه استحملته وليها أفضال عليه بعد ربنا وبعد والده ووالدته، حتى كان اسمها مروة يعنى مراته الأولى هى سبب جوزته التانية لما ساعدته أنه ينجح ويشتهر اتجوز عليها مش دايما الجميل بيتحفظ والرد بيبقى شكرا". وكتب محمود عبد النبى: "أنا فجأة حسيت انى عامل LOG IN من أكونت معز مسعود، خلاص يا جماعة عرفنا أنه اتجوز بسنت نور الدين وإنها الزوجة الثانية، وأن معز مسعود حلق الدوجلاس"، وعلقت سارة البدوى قائلة: "أنا حزينة، أنا كنت بحب معز مسعود قوى، شايفة إنه مثال للرجل أفلاطونك الذى يزكى النفس". ونشر أحمد حسين صورة معز وبسنت وعلق قائلًا: "داعية إسلامى متزوج وعنده 40 سنة ولديه أطفال، بسنت نور الدين، مرشدة سياحية عندها 27 سنة إيه رأيكم فى التعدد بقى دلوقتى، حلو مش كدة؟ يلا مبروك على كل حال"، وشاركت نورهان زياد وكتبت: "زفاف معز مسعود على كتكوتة السياحة، ملحوظة معز مسعود متجوز وعنده عيال يعنى العسولة خطفاه من بيته، والكتكوتة خرباها سفر يعنى ضد اللى كان معز داوشنا بيه محرم ومش محرم". وتساءلت نعمة فتحى فى منشورها: "هو معز مسعود ، متجوز وعنده ولد ؟ الله هو كان بيعمل بروفة مشهد وبعد كدا صور المشهد، عموما مالناش دعوة، ألف مبروك وربنا يسعدهم عقبال جميع البنات"، وكتب معتز عادل تغريدة ساخرة قال فيها: "بعد كده الى هيتكلم على بسنت نور الدين معز مسعود هيدعى عليه، وخلى بالك ده دعوته مستجابه وهيسخطكم قرود". وكتب آخر: "معز مسعود تزوج بسنت نور الدين اللى كانت بتعمل فيديوهات عن الآثار، معلومة كده ملهاش لازمة، معز متزوج ولديه أطفال بس ده داعية إسلامى عادى". وكان مستخدمى موقع التواصل الاجتماعى قد أعادوا نشر تغريدة للداعلية الإسلامى كان قد كتبها عبر حسابه منذ أربعة أشهر يشيد فيها بفيديوهات بسنت نور الدين قائلاً: "جميل أن تعيد اكتشاف تاريخ بلدك وجمالها نتيجة جهد يستحق الاحترام، سعيد بفيديوهات بسنت نور الدين عن مصر".