شهد الرئيس عبد الفتاح السيسى ، رئيس الجمهورية ، افتتاح المرحلة الرابعة لتطوير وتحديث مستشفى كوبرى القبة العسكرى.
وحرص الرئيس السيسى على التفاعل مع العرض المقدم من الضباط والقادة ، وذلك بسؤاله فى بعض التفاصيل الخاصة بكل مشروع .
وخلال عرض أعمال تطوير قسم شئون المرضى ووحدة الميكروفيلم ، قام الرئيس عبد الفتاح السيسي بمداخلة مع مسئول تسجيل وحفظ بيانات المرضى ، وسأله "هل ده أحدث منظومة عمل لحفظ الوثائق وأوراق المرضى فى العالم؟ يعني انا لو سافرت امريكا هشوف أحدث منها؟
فقام المسئول عن العرض ومسئول وحدة المايكروفيلم بمجمع كوبرى القبة الطبي أنه بعد تطوير المنظومة لم يتبقى لنا سوى 5 سنوات فقط من الأوراق ، وأعدمنا باقى المستندات بعد حفظها بنظام الميكروفيلم .. ليعيد الرئيس السيسي السؤال مرة أخرى ، وهنا قام مدير فرع النظم بالقوات المسلحة " ده أحدث ما يمكننا تصنيعه فى فرع النظم داخل القوات المسلحة ، وليس أحدث منظومة فى العالم" .. فقال الرئيس "شكراً يا فندم".
وعند قيام رئيس فرع المعامل التشخيصية بشرح المرحلة الأولى لأعمال تطوير معامل القوات المسلحة البحوث الطبية وبنك الدم ، قام الرئيس بمقاطعته ، وقال "هل ده أكتر حاجه نقدر نعملها؟" ، ليقوم مدير المعامل بالرد قائلاً ، " أن المرحلة القادمة من التطوير ، لعمل منظومة لربط أكياس الدم منذ خروجها من المستشفى وحتى وصولها للمريض ، وذلك يستلزم تطوير أسلوب وأسطول نقلها ، والكثير من العمل حتى يتم مراقبتها جيداً ، بتكلفة حوالى 40 مليون جنيه ، فقال الرئيس على الفور "طب تصدق عليها يافندم" .
ويضيف الرئيس السيسى أنه يريد الوصول إلى نتائج تحاليل محترمة ، لا يوجد مكان بالعالم ، يستطيع التشكيك في نتائجنا ، وقال له الرئيس " انا كنت باعتلك رسالة من سنة ونص ، وصلتك يافندم؟" فقال "وصلت".
ويستكمل الرئيس قائلاً " لو كنت قلت وقتها أنك محتاج المبلغ ده كنت صدقت ، عشان نختصر الوقت".
وقال الرئيس " بعد لما حطينا إيدينا فى الشغل ، أصبح منظومة الصيانة اللى تعاقدنا عليها 3 سنوات ، مش هندفع فلوس صيانة لمدة 3 سنوات ، بدل سنة واحدة قديماً.
وعند قيام مسئول مفرزة الأمن ، بعرض أعمال تطوير ساحات الانتظار ، سأل الرئيس اللواء هارون أبو سحلى مدير مجمع كوبرى القبة الطبى العسكرى ، "هل بناخد فلوس على انتظار السيارات فى تلك الساحات؟ ليرد اللواء هارون : " نعم يافندم"
ويقول الرئيس "مهم جداً إننا ندور على مصدر دخل للمشاريع اللى بنفتتحها ، عشان أحافظ على الخدمة اللى بتتقدم للناس ، لازم أفكر أجيب الفلوس إزاى ، ويؤكد " عشان نعمل إحلال وتجديد لازم فلوس ، مش هنقول الـ 3 أو 4 جنيه انتظار السيارة عبء على المواطن .. لأ .. دى ظروف دولة وبلد ظروفها صعبة ، لازم كل واحد فينا يمد إيده يحط حاجه".
وأضاف السيسي "الرفق مش إنى أقول مفيش رسوم ، ولكن الرفق هو تقديم الخدمة على أعلى مستوى ، وتقدم لكل الناس ، بأقل تكلفة ممكنة".
وسأل الرئيس وزير الصحة عن المستشفيات المتكاملة على مستوى محافظات الجمهورية؟ .. مضيفاً " لو قدرنا ندخل القطاع الخاص أو المجتمع البدوى ، ناخد منهم رسوم المستشفى وإقامتها ، ومستلزماتها ، والفلوس دى نتفق معاهم إننا نقدمها كعلاج للناس".
وأضاف " لو مستثمر عايز ياخد مستشفى 100 سرير ، أو مؤسسة الأورمان أو مصر الخير ، ياخدها بمقابل مثلا مليون أو 2 مليون ، والرقم ده نعمل آلية ونظام ، يقدر المواطن العادى من خلاله إنه يتعالج بيه" .. ليرد وزير الصحة "إحنا شغالين فى ده يافندم" .. ويقاطعه الرئيس "لأ أنت تيجيلى وتقولى عندنا كام مستشفى وعملنا فيها إيه ، عشان ميجيش حد يقول إننا عندنا مستشفيات مش شغالة ومش مجهزة .. لازم نعلن للناس إحنا بنعمل إيه ، وشغالين إزاى .. هاتلى منظومة وعدد مستشفيات نقول إنها اشتغلت ونعلن للناس خلال فترة كذا تكون خلصانة".
وأضاف السيسي " نرجع لمنظومة الصيانة والإحلال ، الخدمة الطبية بتتكلف كتير جداً ، اللى بيتحط من موازنة الجيش كتير ، ولكن لازم ندور على زيادة الموارد".
ليقوم اللواء بهاء زيدان مدير أحد المستشفيات بالمجمع الطبى بكوبرى القبة بالرد قائلاً " يا ريس إحنا اشترينا 700 ماكينة لغسيل الكلى من وزارة الصحة وأخدنا عليها ضمان 5 سنوات ، وبعد السعر الجديد للدولار ، خدناها بتمن زى ما خدناها من سنتين" ، ليرد الرئيس "يعني لو كانت بـ 100 دولار دلوقتى إنت خدتها بـ 50 دولار بس " .. ليرد اللواء بهاء فوراً " ايوه يا فندم ".
ويستكمل الرئيس " ده واحد ضابط حط جهده وإرادته وضميره بذل جهد وقرر إنه يعمل ويحقق حاجه للبلد مش بس للجيش ، أنا بقول الكلام ده عشان يكون فى كل المستشفيات ، الجامعية وغيرها ، وكل القطاعات.. فى الأخر أنا بطلع الدولار ده من فلوس مصر ، لو أقدر أعمل بسعر مخفض للكل ، عشان نقدمها بصورة مخفضة للناس".
وقال السيسي " فين مدير كلية طب القوات المسلحة .. فين اللواء أيمن .. سيادة اللواء أنا محتاج أرفع مستوى التعليم مع جامعات من الخارج ، ويدينى ترخيص بمزاولة المهنة.. وكمان محتاج إننا نطلع طلاب الكلية للدراسة فى الخارج .. وعايز اعرف قدرتنا إيه على استدعاء مدرسين من الخارج ، يشتغلوا مع مدرسينا هنا".
ويرد مدير الكلية "إحنا بنتعاون فى مجال البحوث العلمية وأرسلنا 2 طلاب للصين ، و 2 أخرين فى الولايات المتحدة الأمريكية ، وحصلوا على المركز الثالث فى مؤتمر للبحوث العلمية ، ووزير الدفاع قام بتكريمهم"
وأضاف "كما أننا قمنا بإرسال 15 طالب لمدة شهر للدراسة بالولايات المتحدة ، ولدينا فترة تعايش 2 طلبة لمدة أسبوع مع جيش الدفاع اليابانى ، و2 أخرين بالهند .. كما أن لدينا تعاون مع الدول العربية ، وأرسلنا 30 طالب لجامعة الشارقة مقسمين على أكثر من مجموعة ، وسنرسل العام الدراسى الأكاديمي القادم بعثات لإنجلترا وأمريكا.
كما أن لدينا مدير التعليم الطبي إنجليزي من أصل مصرى ، وتم اعتماده منذ يوليو الماضى ، كما أن لدينا 12 خبير عملوا 14 ورشة عمل لأساتذة الكلية ، لكى يتم تدريسه للطلبة بعد ذلك.
كما أن لدينا 2 من الطاقم الطبي حصلوا على درجة ماجستير التعليم الطبي من إيرلندا ، كمنحة مقدمة من الشيخ القاسمى حاكم ولاية الشارقة ، كما أن لدينا تعاون مع إحدى جامعات اسكتلندا ، كما أننا نقوم بتطوير الكلية وتم الاتفاق مع اللواء كامل الوزير رئيس الهيئة الهندسية للقوات المسلحة على تكوير المعامل والأبنية التعليمية ، ليرد السيسي فوراً " أنا مصدقلك على أى حاجه تعملها ، وده تصديق مفتوح بس خلّص.
وأضاف الرئيس :" احنا عايزين نقول للناس ان المصريين قادرين على اى حاجه ، ودورنا الاعداد الجيد للجيل الجديد قبل ما نخرجهم ، وفكر الكلية هو إعطاء الفرصة والسماح باستضافة الكليات المدنية ، فى نظام شبه عسكرى ، لكى تضخ المنظومة أفراد للقطاع المدنى ، أحنا فى مستوى جيد فى مصر وعايزين نزود المستوى اكتر ، وعملنا نقلة .. ممكن كليات الطب فى القطاع المدنى تستفيد مننا واحنا نستفيد منهم .. يبقى تندنا طبيب وتمريض جيد على اعلى مستوى".
وفى نهاية اللقاء قال اللواء هارون أبو سحلى مدير المجمع الطبي بكوبرى القبة ، أننا قمنا بافتتاح 125 مشروع خلال الـ 7 سنوات الماضية ، وأضاف أن هناك 36 شركة مدنية ، بطاقة 6 الاف عامل شاركوا فى أعمال التطوير .. ويضيف اللواء هارون " كل الشكر والتقدير للمشير محمد حسين طنطاوى الذى أولى اهتمام عير عادى بالمجمع الطبي" .. ليقوم جميع الحاضرين بالتصفيق ، ويستكمل " كل الاحترام والتقدير لكل القائمين على المشروع" .. ليرد الرئيس السيسي " ده عمل عظيم ، انجزناه فى مدة قصيرة ، عشان نقدم خدمة طبية فى وسط أعمال انشاءات وتطيور ، والمجمع اضافة للخدمة الطبية بالقوات المسلحة ، كل الشكر للواء هارون وكل العاملين".