فى "سوق الجمعة" بمنطقة البساتين هتلاقى كل حاجة هناك أو بالمعنى البلدى هتلاقى كل حاجة من الإبره للصاروخ.. كل ما يخطر على عقل الزبون هتلاقيه.
"سوق الجمعة" هو سوق اجتماعى يعمل أسبوعيا على مدار العام فى إجازة نهاية الأسبوع فقط يومى الجمعة والسبت، يعتبر هذا السوق منفذ البيع لدعم المشاريع الناجحة للشباب والأسر المنتجة، كما يحتوى السوق على أنشطة ترفيهية تناسب جميع أفراد الأسرة.
سوق الأثاث المستعمل لتجهيز العرائس
وفى شارع 16 بمنطقة الإمام والتونسى ينتشر بائعو الأثاث المستعمل فالخامة على حسب السعر، حيث رصدت كاميرا "فيديو 7" قناة انفراد المصورة، الأثاث حتى الأبواب والشبابيك الخشب والألمونيوم.
وبسؤال "عم سمير"، أحد الباعة بسوق الجمعة عن المعروضات رد قائلاً، "العرسان بتيجى عندنا تشترى وبيجهزوا نفسهم بـ6 آلاف جنيه، وفى برضه ناس بتيجى تجهز شقتهم بـ3 آلاف كمان".
وأوضح "عم سمير"، "عندنا أبواب وشبابيك بأسعار رخيصة جدًا تبدأ من 50 جنيه حتى 400 جنيه، وكمان الأبواب والشبابيك الألوميتال موجود عندنا كل المقاسات وبأسعار تختلف كليا عن الجديد.. الناس مش لاقية ومش ملاحقة على الأسعار والكل بيجى على المستعمل.. بيجيلنا عرسان مش قادرين لأن أوضة النوم الجديدة بعشرين ألف".
واستطرد البائع قائلاً، "فى أساتذة كبار بيجوا هنا عشان يجهزوا مكاتبهم، ويلم الموضوع بـ300 جنيه بس".