قالت الفنانة سميرة عبد العزيز، زوجة الكاتب الراحل محفوظ عبد الرحمن، إنها تعرفت عليه خلال مسرحية على مسرح سيد درويش، حيث أعجبت بالعمل المسرحي، وطلب من الحاضرين أن يصلوها بالكاتب، فقالوا لها إنه في الكويت الآن، وظلت المسرحية في ذاكرتها، وبعد مرور فترة، عرضت عليها شركة مسلسل "عنترة" وكانت من كتابته أيضا وعندما سألت عليه وجدته أيضا في الكويت.
وأضافت، خلال مداخلة هاتفية مع الإعلامية ريهام إبراهيم والإعلامي عمرو خليل ببرنامج "من مصر" الذي يذاع على قناة cbc: "اتعرض عليا دور تاني بعد عنترة، في مسلسل اسمه محمد الفاتح، وساعتها بقى قابلته، عاتبته لأنه كتب المسرحية للكويت، وقالي أنه اضطر أنه يعمل كدة لأن الرقابة في مصر منعتها من العرض، ساعتها قولتله أنا آسفة، واحترمته لما قالي مش هكبر دورك في مسلسل محمد الفاتح ووافقت عالدور بعد ما كنت رافضة لأنه كان قصير أوي".
وقالت: "جيت فمرة اشتركت معاه في عمل تاني، وبعد العمل بسلم عليه وبقوله يا ريت نتقابل تاني، قالي تعالي نتجوز، ساعتها رديت قولتله أنا خارجة من تجربة وعاوزة اتفرغ للفن، قالي ما أنا كمان كنت متجوز وعاوز اتفرغ للفن، إحنا هنعمل فن حلو مع بعض، وفضلنا سنة بنكلم بعض في التليفون، وفمرة رايحين تونس عشان شغل، وهناك قرر يتجوزني، وهناك معرفناش نعقد القران لأن الجواز هناك كان مدنى، وساعتها تم حل الموضوع ده وكان معانا شيخ عقد القران".
وأضافت الفنانة سميرة عبد العزيز: "بعد ما أتخرج من كلية الآداب قسم تاريخ، وماشي في مرة في دار الوثائق وقع عليه دوسيه، كل دي كانت وثائق حفر قناة السويس، فهو اتجنن، قال مصر مات منها كل الأبطال دي في الحفر، وخيرها مكنش بيرجع لمصر؟، وراح كاتب بوابة الحلواني، وفضل من الدوسيه ده يجيب المعلومات وكتب بوابة الحلواني 93 حلقة، وكان كل أسبوع يروح يتمشى في السويس وبورسعيد".
وأضافت: "لما جه يكتب مسلسل أم كلثوم، بعض الناس قالوله أنت هتدخل عرين الأسد، وساعتها راح جاب كل المعلومات عن الست أم كلثوم، وجاب تسجيل نادر للست، بتحكي فيه عن نشأتها وأهلها، وكنت دايما بقعد جنبه وأرقمله الورق بتاع المسلسلات، ولما عرفت دوري في أم كلثوم فضلت أقرأ دوري طول الليل".