مفطّراتى

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى الحرب داخله.. والأرض نخله وانا لسّه ماشى.. وف إيدى مخله جندى ابن جندى.. رغم انى افندى فلاح قرارى.. طارح سفندى صيّاد ووشى يشبه لغاندى أجرى ابن دايه.. كلّ الحكايه مش فارقه.. لكن.. الأرض غايه الحرب داخله.. وسلاحى صاحى وحياة أبويا لادبح أضاحى وامشى بتجلّى.. أنده واخلّى كلّ اللى قال لى.. يرجع يقول لى هذا أوانى.. شاعر محلّى لفّيت حوارى.. ساعة العصارى ومشيت أغنّى فوق الكبارى: ............... ع الطبله ماشى.. نيلنا النجاشى سواقينا دايره خلف المواشى أراضينا طارحه... والخلق سارحه والشمس طرحه فوق الشواشى مصر المناره.. أرض الحضاره جامع/ كنيسه ........ فندق وحاره مصر المحبّه... أرض الأحبّه رمضان جامعنا.. أطفال حجاره ................. مفطّراتى.. ماشى بآلاتى ويّايا طبله ومغنّواتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى