مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
ماشى باطبّل... اضحك واسبّل
الشمس طالعه.. والريح مقبّل
النيل بتاعنا... والخير متاعنا
وانتى اللى قادره.. فى الكون تساعنا
مفتون يا طِيبه.. يا بلاد حبيبه
مفتون وعمرى ما نطقت عيبه
حافظ لسانى.. لاجم حصانى
عارف مكانى... مليانى هيبه
اسمى ف إيديكى.. ناضح عليكى
فرحانه بيّا... باتباهى بيكى
راسمانى مادنه... راسمك مدينه
بادرانى غلّه... طارح عنيكى
ولا عمرى كنت.. غير بسّ ليكى
باخلِص بجهدى.. واصدُق فى عهدى
ابنك ضناكى.. فارش خطاكى
... عنبر وحِنّه...
حامد ومينا وحسين وحنّا
حالف لاخلّى.. غناويكى جنّه
هذا أوانى.. ورضاكى مِنّه
لفّيت حوارى.. ساعة العصارى
ومشيت أغنّى فوق الكبارى:
.............
لو ما كنتيش شايفه.. شوفى
.. لهفتى ف بعدك.. وخوفى
طفت ف عيونك بروحى
... فادخلى برجلك وطوفى
قلبى ساحة تمرحنّه
... وضحكتك أوّل حروفى
بأعشقك وكأنّ عشقك
فى البدن صار «عشق صوفى»
.............
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى