مفطّراتى لـ سعيد شحاتة .. الحلقة الـ 28

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يا الله يا مأدّناتى ادّن وكبّر.. الفول مشبّر والباميه.. تسلم.. إيدين مراتى يا شهيد معدّى... اصبر وهدّى وافطر معانا... قال مش بيدّى يا دمّ سايل.. سقى الفسايل الورد خلفك.. رسم جدايل يا رصاص يا خاين.. يا صوت مماين ليه تقتلونا... جوّه الكماين ليه تقطفونا... وتفرفطونا واحنا اللى لسّه طارحين جناين يا شهيد معدّى.. ألفين تحيّه ومهما يجرى.. مصر اللى جايّه هذا أوانى.. شاعر قضيّه لفّيت حوارى.. ساعة العصارى ومشيت أغنّى فوق الكبارى: ............. يا دم أخويا اللى مات داخل حنايا الصدر يا وش بنت القمر لحظة بزوغ البدر علّمنى أكونك ملاك وضفيره ع الشباك وادينى فرصه انتقملك من شيطان الغدر ............. وقف البطل على ضفتك صايم فارد دراعه لضحكتك ع التل صلاكى فرض وقال مانيش قايم إلا أما أجيبك ورده للى انذلّ سلّم سلاحه ووحد الدايم دمّع مذيعك وانتشى المختل ............. دمّ اللى مات ع الضفه كان دمّى دم اللى مات ع الضفّه دمّ الناس دم اللى مات ع الضفّه دم أمى دمّ الكتيبه وضحكة الحرّاس بدن اللى مات فى الضلمه متغمّى يشبه لجسمك... قلب شايل راس ............. يا ضحكتى المفروده فوق الخد دمى اللى سايل مداين لسه مش ع القد دمى اللى فات ع الجناين يوصف النعناع فات ع الجياع فى القصيده وعلموه يحتد يا أم الضفاير سهام فى مواجهة الأتباع سنّينى سيف للكلام وسيفين لساعة الجد ............. العيد هييجى إزاى على الأطفال والطفل ماله ومـــال غبى وخيّال إيه اللى يغصب أب ع الفرقه مين اللى يقتل أبّ عنده عيال؟ ............. مفطّراتى.. ماشى بآلاتى ويّايا طبله ومغنّواتى بنقول له يا الله يا مأدّناتى ادّن وكبّر.. الفول مشبّر والباميه.. تسلم.. إيدين مراتى