ننشر قصيدة جديدة للشاعر مسعود شومان بعنوان "عارف يارب":
يا رب عارف
إن أنا راجل مسن
تقدر تشوف عمرى فى طفاية السجاير
وتشوف كرامتى فى توب منشور على الشباك
أنا أوضه ع الشارع وجارحينها الجيران
عكازى صاحبى
ودقنى لو طولت بيعرف ويعاتبنى
وكله إلا شماتة العكاز
كل اللى شوفته مجاز
وكومة القش عليت بس عارفه قيمتها
وفى يوم صحيت الفجر
لقيت أوضتى مليانه سبح ومصاحف
فضلت أعوم وحواليا المراكب هايمه
فى كل مركب واد وبنت
واللى لفت نظرى
رفرفة علمين على الصارى
مكتوب على طرف واحد
"ياللى ابتليت دارى"
والتانى بيرفرف وبس
رايحين لفين يا حبايب
رد المراكبى اللى دايب
مركب وفيها لربنا طب مين يغرقها
كانت السما فوقنا بتجرب بيبانها
والموجه من تحتنا تشبه دموع فرحان
الشوق واخدنى وصدرى بيشخشخ
كحيت وإيدى ماسكه فى السبحه
شوفت البنات حاضنين بنات سمحه
وناس بتضحك والملايكه صفوف
حلقت دقنى ساعتها
ومشيت كأنى سليم
وع المراكب لقيت العيا نعسان
كبشت حبه بالحفان م النور
جسمى بقى حته منه
ووقعت يا سامعين فى بحر ماله شطوط
ندهت لعيالى
وحضنتهم وبكيت .