لو_قابلت_نفسك_تقولها_ايه.. هاشتاج جديد يشعل تويتر.. ومغردون: بهدلناكى معانا

بأكثر من 30 ألف تغريده، تصدر هاشتاج "#لو_قابلت_نفسك_تقولها_ايه" قائمة ترند تويتر فى مصر، عبر من خلاله المغردين عن آرائهم وتخيلاتهم عن أشياء فى أنفسهم كل من وجهة نظره. وتنوعت تغريدات المشاركين من خلال الهاشتاج، حيث قالت ميمى: "يا ريت تختارى الناس صح بقى، بدل ما انتى مبهدلانى معاكى كده"، وقالت مريم صالح: "هقولها بطلى أكل حرام عليكى"، فيما قالت أمل على: "انتى ليه بتعملى كده، ليه بترهقينى وليه بتفكرينى باللى عاوز أنساه، ليه غاوية تعب ومقضياها عياط، خلى عندك دم وفوقى محدش يستاهلك ولا يستاهل قهرتك ودموعك". أما ندى، فقالت: "اوعى فى يوم حد يزعلك أو تعيطى عشان حاجة متستهلش، انتى أقوى من كده، خليكى دايما مبسوطة وبتضحكى مهما كان"، بينما قالت أسماء فايد: "مش ناويه تفوقى معايا كدا وتساعدنى ولا إيه، مش هتحسى بيا بقا ولا إيه، عيب عليكى، إحنا بقالنا سنين مع بعض، صالحنى بقا أحبيبتى". وأضاف محمد شاهين: "مش هنرتبط بقى ونبقى فى نكد ولا إيه"، وقال إبراهيم: "هحضنها وأطبطب عليها وأقولها معلش وأضربها بالقلم وأمشى"، بينما قال مصطفى: "يااااااه، ده أنا هجبلها ورد وأعزمها، أصلى نفسى مفتقدة الاهتمام من فترة، ونقعد نشرب شاى بنعناع وأحكى معاها واسألها ليه وصلتى للمرحلة دى". وقالت سومة: "متزعليش لو يوم قدرتى حد ومفهمكيش، شكرا لأنك وقت الضعف متهزتيش ولأنك كنتى جامدة ومتعبتيش وكنتى صريحة ومبتخبيش، شكرا لأنى كنت دايما شاريه ومبتبعيش، شكرا لأنك رغم كل ده لسه واقفة على رجلك وموقعتيش، شكرا لأنك فضلت زى مانتى متغيرتيش"، وقال محمد أسامة: "استقيمى، وحشتنى نفسى بتاع زمان، نفسى الحلوة االلى كانت كلها ضحك وأمل وهزار، وحشتنى نفسى لأنها تقريبا راحت مع اللى بيروح".