آلاء ترسم قصصا للأطفال بقشر البطيخ وبذر المانجو.. "مافيش حاجة بتترمى".. صور

يفضل الكثير منا تناول البطيخ، سواء مقطع شرائح أو قطع كبيرة وإلقاء القشر بعد ذلك، لكن آلاء عرفة تتعامل مع البطيخ بطريقة مختلفة، فهى تعتبره مادة فنية يمكن تشكيلها بسهولة لأشكال مختلفة سواء أشخاص أو مراكب أو سيارة وغيرها، لاستخدامه فى تصميم قصص للأطفال، وليس البطيخ فقد ولكن أنواع مختلفة من الخضراوات والفواكه. تحدثت آلاء عرفة، البالغة من العمر 30 عاماً وتعمل مدرسة تربية فنية بإحدى المدارس، وأم لثلاثة أطفال عن بداية تجربتها للنحت على الخضراوات والفواكه، لـ"انفراد"، قائلة: "الفكرة بدأت لما كنت بلعب مع أولادى فى تصميم بعض الأشكال من قشر الخضراوات والفواكه، وبدأت أشجع أصحابى والمتابعين ليا على مواقع التواصل الاجتماعى، من خلال تصوير الأشكال اللى بعملها أنا والأولاد، ونشرها على صفحتى وكانت بتعجب أصحابى جداً، وبيشاركونى فى نشرها، وده شجعنى أكتر إنى أكمل". وأضافت آلاء: "جربت أنحت فى أنواع مختلفة من الخضراوات والفواكه زى بذر المانجو وقشر البرتقال والبطاطا والبطيخ، وده عملت منه قصة مصورة، للأطفال، وعرضتها على دار نشر وعجبتهم جداً، ووافقوا ينشروها، وبكدة قدرت أحول قشر الأكل لحاجة مفيدة، بدل مايترمى فى القمامة". وعن مدة صلاحية قشور الفواكه والخضراوات والأدوات التى تستخدمها، قالت آلاء: "أنا بستخدم سكينة ومقص المطبخ، فى تصميم ونحت الأشكال سواء من قشور الفواكه أو الخضراوات، لأنهم بيساعدونى فى التصميم الأشكال بسهولة جداً، لكن للأسف مدة صلاحية التصميمات بتختلف من نوع لنوع آخر، يعنى قشر البطيخ مدة صلاحيته بتنتهى بسرعة، عشان كدة بصوره عشان أحتفظ به، لكن بذور المانجو وقشر البرتقال، بنشفهم و وبحتفظ بيهم، لأنهم مش بيجرالهم حاجة ومدة صلاحيتهم طويلة شوية". وختمت آلاء حديثها، لـ" انفراد"، معبرة عن أمنيتها، قائلة: "نفسي أكرر تجربة قصص الأطفال، وأنشر أعمال كتير لقصص أبطالها قشور الخضراوات والفواكه".