جذب الزى السيناوى رواد معرض تراثنا هذا العام، ويعد التطريز اليدوى في الثوب السيناوى من أهم وأجمل المعالم التراثية في سيناء، لذلك إلتف الكثير حول منتجات جمعية تنمية المرأة بشمال سيناء داخل المعرض، وقد التقى "انفراد" مع آية توفيق إحدى فتيات سيناء التي تدرس في السنة الأولي بكلية التجارة جامعة العريش.
قالت "آية": "شاركت الجمعية في العرض بمنتجاتها من شيلان والعبايات وشنط ومنتجات الأعشاب زي الزعتر والدقة والمرمارية، بالإضافة للعجوة السيناوى، وجميع المشغولات والاكسسوارات اليدوية".
واضافت: "معرض تراثنا من المعارض المهمة اللى شاركت فيها، الناس هنا مبسوطين من شغلنا وحركة البيع والشراء شغالة، وأكتر منتج لاقي اقبال هو الكمامة السيناوى الهاند ميد"، وبسؤالها عن ملابسها قالت: "أنا لابسة الزى السيناوى عشان أعرف الناس تراثنا وتفضل الناس فاكراه على طول، وكمان هو عامل جذب لزوار المعرض.. الستات عندنا فى المشغل هما اللى بيشتغلوا الزى دا، بيتقسم الشغل عليهم كلهم، والثوب الواحد ممكن ياخد شهر أو شهر ونص، زمان كان لازم المرأة السيناوية تلبس ثوب العرب لكن دلوقتى صعب جدا ممكن بس تلبسه البنت يوم حنتها عشان تفرح وتفرح أهلها كتغيير".
واكملت "آية توفيق" حديثها قائلة: "مش أول مرة أشارك في المعارض، شاركت كتير جدا قبل كده، ومشاركتنا في المعارض بتفتح لينا أبواب التسويق، وبتساعدنا في ترويج منتجنا وبنساعد الستات اللي في الجمعية وبنفرحهم وبنبيع حاجتهم وبيكسبوا فلوس على تعبهم، وأقول لكل فتاة سيناوية، افتخرى بتراثك السيناوى".