أحمد عمل مكتبة متنقلة فى طنطا لنشر الثقافة وحلمه تغطية محافظات مصر

بمكتبة متنقلة على سيارة نقل بدأ أحمد توفيق صاحب الـ29 عامًا تحقيق حلمه فى امتلاك مكتبة كبيرة تضم كتبا من الإصدارات القديمة والحديثة لدور النشر المختلفة لحث الناس وتشجيعهم وتنمية ثقافتهم القرائية، وتمكينهم من المطالعة الورقية بعيداً عن صخب السوشيال ميديا ومواقع التواصل الاجتماعى، وذلك وفقًا لما قاله فى حديثه مع انفراد. عشقه للقراءة لم يكن وليد الصدفة فرغم أن "أحمد" تخرج فى كلية التربية الرياضية، لكن مجال دراسته لم يقف عائقًا أمام حبه وعشقه للكتب، وعن ذلك قال: "والدي كان مدير قصر ثقافة المحلة، وكنت ديما ببقي متواجد في القصر، وطبعاً ببقي موجود في المكتبة الخاصة بقصر الثقافة، بس بتبقي إصدارات قديمة". وأردف: "كانت ممتعة برضه، وكان في ناس بتيجي تعمل معارض كتب في القصر وبتجيب الإصدارات الجديدة، ولما خلصت دراسة كنت متعرف على ناس من اللي بتيجي القصر، وكان من ضمنهم أستاذ هاني اللي كان ليه فضل كبير عليا، واللي اقترح عليا نعمل معارض في المحة وطنطا وأشاركه فيها، حبيت الفكرة جدًا، ورحبت بيها طبعًا". وأضاف "فعلا شاركته لأني حابب المجال ده جدًا فضلنا مع بعض حوالي 5 سنين، وعملنا معارض كتير في طنطا والمحلة بس كانت فكرة العربية فى دماغي كنت شوفت حد منفذها في إنجلترا وكذا دولة في أوروبا وعجبتني جدًا، لأنها هتوفر عليا إيجارات المعارض، وهتبقي متنقلة وهتساعدني إني أوصل للناس أكتر لحد الحمد لله ما ربنا كرمني ونفذت الفكرة من سنة تقريبًا". كانت ردة فعل كل من شاهد مشروع أحمد توفيق إيجابية للغاية، واختتم حديثه لـ"انفراد" قائلًا: "كتير اتحمسوا للفكرة وفرحت إنها عجبت ناس كتير، وده بيدل على إن الكتير مننا مثقف وبيحب الكتب وبيهتم بالقراءة، وبحلم إنى أنفذ الفكرة فى كل محافظات مصر".