مهندسة مصرية تحصل على جائزة المعمار العالمى بتصميم مخيم فى سيناء

"هما بيدورا على المشاريع اللى فيها روح انتماء لبلادها، وده كان مشروعى" بهذه الكلمات المليئة بروح الوطنية المصرية بدأت المهندسة طيف المقدم حكاية حصولها على جائزة مجتمع العمارة العالمى 2020، لـ"انفراد"، بمشروع مخيم فى جنوب سيناء تحديدًا منطقة وادى العريش، والهدف الرئيسى من إنشائه هو أن يظهر أرض سيناء الجميلة بطريقة ترفيهية وتعليمية فى الوقت ذاته، وينشط السياحة بالمنطقة. وقالت طيف لـ"انفراد": "ده كان مشروع تخرجى، أنا درست هندسة قسم تصميم داخلى، وكان هدفى إن المعسكر يكون مختلف عن غيره، خاصة السنة اللى كنا بندرس فيها كانت الدراسة تحت شعار "اصنع مصر بكرة" فقررت اعمل مخيم يقدم مصر فى 2030". وعن اختيار المكان قالت "اخترت سيناء عشان أنا فخورة إن فى فمصر مكان زى سيناء وأى حد يسألنى أسافر فين برشح له سيناء، هى أرض تستحق الزيارة ومعرفة طبيعتها لأنها مكان جميل وناسها جميلة ولازم نعرف الحرف الجميلة الخاصة بها". وعن سبب التسمية قالت "سميته ضى لسببين، الأول إن ضى ده اسم أختى الكبيرة قدوتى ومثلى الأعلى، السبب التانى المعنى لكلمة ضى وهى الضوء الخافت للقمر" فأنا حبيت المشروع يرمز لضى القمر فى أرض سيناء وكأنه الضوء فى وسط الظلام". أنشطة المخيم قالت طيف إن تصميم المخيم مقسم إلى طوابق، الطابق الأول عبارة عن مطعم يطل على جبال سيناء، تستطيع الجلوس فيه مع الأهل والأصدقاء. وتابعت "أما الطابق الأعلى عبارة عن روف فيه ما يشبه الكبسولة زى التلفريك وبيكون فيها بدو يحكوا عن تاريخ سيناء وعاداتها وتقاليدها، وحكايات النجوم اللى هى الهدف الرئيسى للمشروع، لأن المشروع مهتم بالنجوم وتوزيعها، والهدف إن أى مكان تعدى فيه تشوف منه البيئة المحيطة لسيناء كلها". وعن أماكن المبيت فى المخيم فهى عبارة عن "أكواخ صغيرة" مقسمة حسب عدد الأفراد وهى دورين تطل على الجبال والطبيعة فى سيناء. وعن اختيارها للنجمة ""Polaris starقالت طيف "فى حاجة بتميز النجمة دى أنك فى أى مكان تروحيه تشوفى النجمة دى فى السماء إلا فى جنوب الكوكب متقدرش تشوفها"، وتابعت "اخترتها عشان البدو أو أى حد فى الصحراء بيستخدموها لتحديد الاتجاهات بتاعتهم لأنها النجمة الوحيدة الثابتة فى السماء، وكل النجوم بتلف حواليها بطرق معينة". وتابعت: "لأن فى الجنوب النجمة مش بتبان صممت "الجاليرى" اللى هو ثالث جزء فى المشروع، جنوب المخيم، يعنى مايشوفش النجمة عشان كده صممته مقفول كله ميشوفش النورعلى شكل كهف، أول ما تدخل "الجاليرى" بتاخد معلومات عن التاريخ بتاع سيناء كله عاداتها وتقاليدها، بطرق مختلفة بطريقة خفيفة وسهلة يستوعبها الشباب". وتابعت طيف: "إحنا بنعمل ورش عمل، للبدو عشان من أهدافنا تبادل الثقافات بين أهل سيناء وبين باقي محافظات مصر، سيناء عندها تاريخ عريق يستحق يتحكى عنه". وعن فكرة المشروع قالت "الشباب بيفضلوا الإقامة فى معسكر أكثر من الفنادق خاصة أنهم بيدوروا على المغامرة فأنا حسيت هيكون أحلي لو المعسكر ده هيساعدك تبقي على علاقة مباشرة بالبيئة المحيطة بيك، والإقامة فيه بتكون استجمام اكتر، فحبيت اعمل حاجة مختلفة تقدر تتماشي مع مصر 2030،وتعبر عن طبيعة المكان في الوقت نفسه". وعن منافسة 34 دولة فى المسابقة قالت طيف "انا كنت متوترة جدا لأن المنافسة كانت بين 34 دولة مختلفة لكن الدكتورة شجعتنى وقالت لى إن المشروع بتاعى ليه معنى، هما يدوروا على المشاريع للى فيها روح الانتماء لبلادها فده كان مشروعي ومشروع واحدة كمان، بعد كده بعد التصفية الأولي لاقيت نفسي في العشرة الأوائل واتبسطت جدا لأن المنافسة كانت قوية، وصفت على خمسة، وأنا منهم الحمد الله كسبت، الفائزين خمسة 2 من مصر واتنين من إيران وحد من الهند، عرفت إنى كسبت جالي ميل والمسابقة كانت أونلاين أصلا من بلاد مختلفة والمحكمين معمارين من جنسيات مختلفة من فكر مختلف ده كان إحساس تحفة إن مشروع تخرجي يظهر في وسط مشاريع عالمية".