من أسقف المساجد لجدران الحضانات والبيوت.. رنا تضع بصماتها الفنية بكل مكان

بحسها الفنى تحمل رنا محسن، الفرشاة وتغمسها فى الألوان المختلفة التى أمامها، لترسم بها ما تخيلته فتحوله إلى واقع، وبدون معلم استطاعت أن ترسم أجمل اللوحات الفنية على الجدران بمختلف الأماكن، بداية من سقف المسجد وجدران المنازل والحضانات وغيرها، لتضع بصمتها الفنية فى كل مكان وتحول الجدار من لوح صماء للوحة فنية مبدعة مليئة بالتفاصيل الفنية البسيطة والمعقدة . تحدثت رنا محسن، خريجة كلية الآداب، قسم علم نفس، بجامعة عين شمس، لـ" انفراد" عن بدايتها الفنية، حيث قالت :" أنا بقالي 5 سنين بشتغل فى مجالات مختلفة فى عيادات طبية كنت مساعد طبيب ومرة مساعد صيدلى ومرة اشتغلت اتش آر، ومهن تانية وكنت كل مرة بحس إنى عايزة أتعلم حاجة جديدة ومختلفة، أسيبها وأشتغل فى مهنة جديدة، لحد ما اتجهت للرسم هوايتى المفضلة". وتابعت :" أنا برسم على الورق من زمان، وأي حاجة بتقابلني برسم عليها سواء زلط أو ورق شجر أو حتى لوح خشب وكوبايات وشنط وهدوم كمان وفى مرة جربت أرسم على الحيطان في الحضانة اللي كنت شغالة فيها، والحمد لله ظبطت معايا من أول مرة، وبعد كده، اهتميت اشتغل فى المجال ده، وأطور من نفسى أكتر، والحقيقة ماحدش علمني، أنا اتعلمت بالتجربة وظبطت معايا و اللي فادني أكتر كان الفنان عبدالله منصور، علمنى إزاي أدير شغلي أحسن وبصراحة هو سبب كبير فى نجاحي لحد دلوقتي ". رسمت رنا العديد من اللوحات الفنية على الجدران المختلفة بداية من مسجد أل خيرت بالرحاب ، والحضانات والمطاعم والمنازل وغيرها، من لوحات طبيعية وشخصيات وغيرها، وتحدثت عن هذا قائلة:" أكتر الرسومات اللى بحبها رسمة المانديلا، وأكتر حاجة برتجلها بسهولة وبسرعة، والرسم على الحيطان فى العموم بياخد من ساعتين لثلاثة أيام، لكن مش بحس بالوقت طول مانا شغالة، والحقيقة مفيش طلبات ثابتة بتتطلب مني، يعني كل مكان دخلته لحد دلوقتي ماتكررش، قبل كدا بس يمكن أكتر حاجة بتطلب منى هى المانديلا ". تواجه رنا بعض الصعوبات فى عملها بالرسم على الجدران، والذى تحدثت عنه قائلة :"الصعوبات اللي بتقابلني لما بتفق على شغل ومايدفعوش المبلغ كامل، ودلوقتى بشتغل على المشكلة دي عشان ماتعرضش لأي مشكلة من النوع ده تاني ". وأنهت رنا، حديثها قائلة :"نفسي وحلم حياتي أفتح جاليري خاص بيا وإن شاء الله ربنا هيوفقني وأعمل ده قريب".