بتفكر برة الصندوق.. "منى" عملت ساندويتشات سجق ببسكويت الأيس كريم وبوكيه كحك

عشقت الطهى منذ نعومة أظافرها، فكانت من أجمل لحظات حياتها جلوسها بجوار والدتها ومشاهدتها أثناء طهى الأنواع المختلفة من الطعام من حلو وحادق، وعندما كبرت أصبحت تساعدها فى الطهى، ولم تكتفى بما تعلمته من والدتها، لكن كانت تشاهد الوصفات الجديدة على التليفزيون وتدونها وتجربها فى منزلها، حتى أصبحت تبتكر أصنافًا جديدة من الطعام وتحشو بسكويت الأيس كريم بالسجق بدلاً من الكريمة. تحدثت منى نافع، التى درست مجال الحاسبات والمعلومات، وتعمل شيف، لـ"انفراد"، عن ابتكاراتها المختلفة للأطعمة، حيث قالت: "أنا عايشة فى السعودية وبحكم القاعدة كتير فى البيت، حسيت بالملل ففكرت أدخل المطبخ وأجرب أصناف جديدة وأبتكر وصفات سواء حلو أو حادق، بس حبيت مجال الحلويات أكتر، وعملت جروب من 4 سنين، وفكرة ساندويتش الأيس كريمبدأت لما زبونة كانت محتاجة أوردر حلويات ومعجنات، وفى وسط الكلام ضحكت وقالت يا سلام لو يبقى بسكويت أيس كريم أصل جوزى بيعشقه، ومن هنا بدأت الفكرة واشتغلت عليها واشتريت ماكينة البسكويت وعملته بيتى 100%، وحشيته عجينة حلوة وجبنة مالحة وحشيته حلو ومالح، والحلو كان بسبوسة وكيك وشيكولاتة، وحشيت واحد تانى بالسجق والكفتة مع جبنة الموتزاريلا والخس". تابعت: "الساندويتشات عجبت الناس جداً، وده شجعنى أعمل حاجات تانية زى الكحك بنكهات مختلفة، وبقى يطلب داخل السعودية، وحتى اللى فى مصر بقوا يطلبوه مع قرايبهم اللى نازلين، وقدمته بطعم الفستق وطعم كيندر والقهوة السينايون واللوتس وتشيز كيك، وعملت بيتى فور بطعم القهوة ونكهات تانية، وتشير كيك على شكل أيس كريم وبوكيه من السابليه والكحك والبتى فور، وتورتة الأكلير على هيئة أرقام". واجهت "منى" العديد من الصعوبات فى عملها بمجال الطهى، والتى تحدثت عنها قائلة: "قابلتنى صعوبات كتير جداً، منها إنى اتحاربت من ناس كتير حاولوا يوقعونى، لكن مقدروش لأنى مؤمنة بنفسى وبعمل الحاجة اللى بحبها، وقدرت أعمل وصفات خاصة بيا أنا مش بقلد حد". تحلم "منى" بتحقيق المزيد من أحلامها والتى تحدثت عنها قائلة: "نفسى إن شاء الله يبقى عندى براند كبير باسمى وأكون شيف مشهورة وعندى سلسلة محلات فى مصر وكل الدول العربية لأنى من عشاق البلاد العربية واللغة العربية بكل لهجاتها".