لو لسه فى سنة أولى أمومة يجب عليكى معرفة كل التطعيمات اللازمة للبيبى، فهناك تطعيم يجب أخذه خلال 24 ساعة من ولادة الطفل، وتستمر فترة التطعيمات حتى العام ونصف.
على الرغم من أهمية التطعيم وفوائده للطفل إلا أنه قد يسبب بعض الأعراض المؤلمة، ومنها "ارتفاع درجة الحرارة، الألم الشديد، الكدمات والاحمرار، والغثيان".
وفى حلقة جديدة من سلسلة حلقات سنة أولى أمومة يقدم "انفراد" طرق التعامل مع البيبى بعد التطعيم زى ما قالت الدكتورة مى سعد الدين استشارى أطفال وحديثى الولادة:
1ـ بعد التطعيم على طول طفلك بيتعرض للسخونية والكدمات والبكاء المستمر، علشان كدا لازم تراقبى كويس درجة الحرارة .
2ـ لو درجة حرارة الطفل لسه مرتفعة لازم تديله خافض للحرارة بس عند اللزوم لأنه ممكن يقل فاعلية التطعيم .
3ـ فى حالة ظهور كدمات واحمرار مكان التطعيم اعملى كمادات مياه فاترة فى أول 48 ساعة بعد التطعيم.
4ـ ممكن تستخدمى كريمات مضادة للالتهاب والكدمات.
5ـ حاولى تخففى عن طفلك من خلال التغذية السليمة والرضاعة الطبيعية.
6ـ لازم تاخدى بالك كويس من كراسة التطعيمات علشان لو سافرتى أو غيرتى الدكتور يكون عنده خلفية عن حالة الطفل من أول يوم ولادة.