بدور فيها عن بابها
يا جنة وكنتى أسبابها
وشربة مية تحيينى
لدنيا أنت أبوابها
فى ركن الخلوة بتصلى
يا شر بعيد ما تحصلى
ملايكة تسجل الدعوة
سحاب الخير يضللى
بدور فيها عن بابها
ياجنة كنتى أسبابها
يا سعد السعد كان قدمك
وجنة ربنا فى قدمك
يعم الخير مع البسمة
إذا دوستى هنا بقدمك
بدور فيها عن بابها
يا جنة كنتى أسبابها
يا نسمة ربنا الحلوة
يا تقوى للقلوب جلوة
يا نومة ف حجرك الدافى
وهمسة و لمسة فى الرقوة
بدور فيها عن بابها
يا جنة وكنتى أسبابها
لحلم معاكى مستنى
يرد الروح يطمنى
واتشعبط فى ديل توبك
لباب الجنة يدفعنى
تقيدى النور لأبوابها
يا جنة وأنتى أسبابها