لما بنتناول جرعة كبيرة من السكر زي مثلا شرب كان كوكاكولا او أكلة بسبوسة تقيلة بالقشطة =D ، فإنت بتخمد مؤقتا جهازك المناعي وبتثبط قدرتة الاستجابية ضد المؤثرات وبيستمر التأثير لعدة ساعات ،ما بالك لو انت بتاكل الحلويات علي مدار يومك بشكل متكرر ، انت كده بتخلي جهازك المناعي يخرف =D طبعا ده بناء علي ابحاث تم اجرائها في السبعينات ( تم عمل مزرعة دم قبل وبعد تناول السكريات وتم زراعة انواع من البكتيريا علي بتري دش ودراستها #( توضيح لغير المتخصصين البتري دش عبارة عن اطباق صغيرة بتتعمل عليها مزارع البكتيريا بتكنيك علمي يعرفه المتخصصين ) .
وجد ان النيوتروفيل ودي نوع من انواع خلايا الدم البيضاء وبتمثل خط الدفاع الاول ضد الهجمات البكتيرية أقل شراهة ف مهاجمة البكتيريا في عينات الدم المأخوذة بعد أخذ جرعات كبيرة من السكريات !
وللأسف علي مدار السنوات لم يتم تكرار الدراسة دي او التركيز عليها او البحث وراها اكتر ولا حتي في دراسة واحدة بتتكلم مثلا عن تأثير السكر ف الاصابة بالانفلونزا او غيره .
لكن الاستجابة المناعية نظام معقد للغاية وعلميا مش هينفع اختزل دور الجهاز المناعي علي النيوتروفيل بس ، لان النيوتروفيل طريقة من عدة طرق وحيل يمتلكها الجسم دفاعا عن نفسه.
يعني في حقيقة الامر وبالرغم من الدراسة الرائعة اللي ذكرتهالكم اني ابص علي بتري دش فيه نيوتروفيل فحالة غيبوبة بسبب تناول جرعة سكر واقول ان السكر بيعمل تثبيط عام في الجهاز المناعي هو نوع من التبسيط المفرط.
من قبل سنتين اتعملت دراسة اخري علي الفئران ولقوا انه السكر بيأثر بالسلب فعلا علي الجهاز المناعي فمقاومة البكتيريا لكنه بيأثر ايجابيا ضد الفيروسات
فالواضح ان الموضوع كتأثير السكر علي جهازنا المناعي محتاج دراسات دقيقة اكتر واكتر وده ميتنافاش مع الضرر البالغ للسكر علي صحتنا وتسببه في تسوس الاسنان والسمنة
الاسراف في السكر مضر جدا جدا بالصحة يجب التقليل منه علي قد م نقدر واستخدامه ف اضيق الحدود ويستحسن بعد عمل مجهود بدني علشان العضلات تستهلكه .