جبت الخيوط والورق وعملت منهم طيارة ورق رسمت عليها حلم بقاله سنين مصاحب خيالى وقلت أخليه يطير للسما عالى، فرحت عيونى لما شافت الحلم طاير زى طير فرحان وهايم .
شد الهوا حاله قطع الخيط وطار الحلم بعيد حاولت عيونى تمسكه بس الهوا مرضيش، سكن الحزن قلبي ما الحلم ضاع وخلاص معدتشي فيه أحلام ولا فيه طيارة ورق خلاص حتى الخيال مخصمنى مرضيش يقولى ليه شكله عتاب ولا حزن على الحلم اللى ضاع .
عدت أيام وفى يوم ماشي فى طريقي وأشوف حلمى اللى رسمته على طيارتى الورق فى أيد طفل صغير فرحان بيه وضحكته عاليه فى السما وقفت عيونى مش راضية تمشي ومن يومها بقيت كل يوم اجيب الخيوط والورق وارسم على الطيارة الورق ولما توصل للسما اسيبها تطير بعيد يمكن اشوف الامل فى عيون بريئة تانى .