القارئ محمد سليم يكتب: اوعى تسكت‎

اوعى تسكت لصاحب كل همه يحبطك من كل شىء بتحلم بيه ونفسك توصلو بحجة أن طريق الوصول مستحيل.. اوعى تسكت لما البنت الى بتحبها سابتك عشان ظروفك ما سمحتش!.. اوعى تسكت لمدير كل همه انو ينجح فى انو يستعبدك ويحاول يبعدك عن طريق نجاحه بأى طريقة.. اوعى تسكت لحد يقولك أنت فاشل بالكلام أو حتى بالإحساس.. اوعى تسكت فى يوم لحد ضربك قلم فى شكل إنو باعك أو سابك فى نص الطريق لأنو ما آمنش بيك.. اسمع منى اوعى تسكت... اوعى تسكت... السكات يا صاحبى أول طريق الإحباط والفشل... خليك قوى ورد.. رد بشدة رد بسعيك وبمحاولتك.. ما توقفش سعى.. اسعى واسعى واسعى والباب الى يتقفل قدامك لحكمه من ربنا اجرى شوف غيره.. حاول انك تكسر كل الجدران الى خنقاك.. اكسرها وعدى حتى لو هتاخد وقت.. بس خليك على ثقه ويقين بالله إن ربنا لما بيحب حد بيصعب عليه الطريق حبتين عشان يسمع دعوة عبده اللى بيحبه وصدقنى فى الآخر بتفتح.. وهيبقى ردك فى نجاحك.. فى تطورك.. فى فكرك.. واوعى تفتكر انك غبى!! لا لا لا محدش جه الدنيا دى غبى لكن بيبقى نقص خبرة والخبرة فى الدنيا والشغل والحياة بتيجى بالممارسة والسعى.. عشان كده اسعى سعيك هو ردك على كل الناس دى ولو فشلت فى حته.. حاول تانى ولو ملكش مكان فيها سيبها وروح حته تانيه عادى.. اتعب واشتغل لحد ما يجى الدور عليك صباحكم تفاؤل وحب للحياة