حمدى نصر يكتب: ياعِلْمْ يامتنور الفلفل الرومى الأسود لزمته إيه؟

فى أحد المولات الكبيرة وجدت أكواماً وأنواعاً من الفلفل: الرومى والفارسى والعربى والهندوسى والأوروبى على كل لون ياباتسته !! أشكال وألوان وأحجام ومذاقات مختلفة لكن لوناً واحداً لفت نظرى وفضلت أجول فى ذاك المول وأنا مذهول وشبه مخبول وبقول: ياعِلْمْ يامتنور ومتْهوّر واخد فى وشك وآخرتها على فين مودينا؟ احنا كل أملنا هدمه تسترنا ولقمه حاف ولحاف على قده نمد رجلينا ياعِلمْ بدل غزو الفضا ازرع لنا لقمة عن سؤال اللئيم تعصمنا وتغنينا ياعينى عليناعشان اللقمة الحاف اللئيم والخسيس باعوا واشتروا فينا بلاش نقلّب فى المواجع ونبكى ع اللى ضيعناه لأن اللى فينا مكفينا " بليز" بطّل لعب فى الجينات عايزين نعيش طبيعى زى عيشة أهالينا ع الحلوة والمرة عاشوا كافيين خيرهم شرهم ولا فى يوم قصّروا فينا صابرين كما أهل العزم فى التحمل وفى الشموخ كما الجبال الرواسينا صبرهم علّمْ فى جتتنا الله يسترها معانا وبكرمه ما يشمت العدا فينا ياعِلمْ: فلفل "الرنبو" ايه لزمته؟ هى الطبلية ماتنفعش إلا بما يشهينا؟! فلفل رومى ألوان: أحمر وبرتقالى وأخضرطازه لونه لوحده بيغرينا وإشى أصفر يسر الناظرين بيلمع قبل الأفواه بتاكله حبابى عينينا أما فلفل رومى أسود طب ليه؟ هى ناقصة سواد؟ ما تفوّلش علينا ! ياعِلمْ فال الله ولا فالك الله الغنى عن جنانك وجيناتك اتق الله فينا احفر لنا بير تجيب الخيرأشكال وألوان تأكلنا شهد وميه حلوه تسقينا مش عايزين رومى اسود.. الله يديم علينا المش فى الوش زينة طبالينا ياعِلمْ الغلبان بيهمه حشو كرشه باللى يسكت له صوصوة المصارينا ! انا مش فنجرى بق ولاعنصرى حق لكن يالعبة الجينات بماذا افدتينا؟ ياعِلمْ خليك عاقل ليه تجرى ورا مظاهر كدابة؟ الجوهروحده بيرضينا