الست المصرية ست نكدية جدا وبتحب العكننة ، دى حقيقة أقرها الزوج المصرى واقتنع بها المجتمع وبصم بالعشرة . هى لية الست المصرية مش فرفوشة كدة زى السورية واللبنانية والأوروبية ؟!!!!!.
هى ليه لما جوزها بيتجاهلها بتزعل وبتجن عليه ؟! المفروض الست المحترمة اللى لما جوزها بيتجاهلها تعمل نفسها كرسى علشان لما يرجع من فسحتة مع اصحابة تعبان يرتاح ويمد رجلة علية .
هى لية الست المصرية بتدور على النكد فى موبايل جوزها و تقرأ الرسائل الغرامية اللى مابتسمعش حرف منهم ؟ المفروض انها لما تشك فى زوجها تتفانى فى خدمتة اكتر واكتر وتعمل نفسها عروسة المولد علشان يأكل حتة منها ويسيب الباقى النمل ياكله .
هى لية لما تسمع وصلة سخرية واستهزاء من اهلة تشتكى وتقولة؟ ! المفروض انها تبقى نخلة كل ماترمى طوب عليها تنزل بلح.
لية الست المصرية لما جوزها يغلط فيها تخاصمه وماتكلمش ؟! المفروض أنها تعمل نفسها مش سامعة لانها مغلفة بمادة عازلة للرطوبة مش بتأثر فيها .
هى لية لما جوزها ما يجيبش طلبات بيتة تعمل مشكلة ؟ المفروض انها تبقى زى الجمل تخزن الأكل والمياة فى سنام ولو الست عربية تبقى محظوظة حيبقى عندها سنامين .
الصراحة الست المصرية نكدية جدا ومش عارفة تبقى ست بمعنى الكلمة . مطلوب من الست تبقى زى البحر تاخد كل مخلفات السفن وتطلع سمك أشكال وألوان . بس ده حتى البحر اشتكى من حمولة المخلفات وأحيانا يطلع سمك ميت وأحيانا سمك ملوث وأحيانا يهيج ويبلع كل اللى يقرب منه .
اعتقد ان الست المصرية فى حالة كبت شديد أوشك على الانفجار ، كل ست بتهرب من كبتها بطرق مختلفة ..... بعض الستات من الكبت العاطفى ادمنوا المسلسلات التركى والهندى ، البعض الاخر من كبت الحرية انعزل عن المجتمع وترك اصحابة واهله ، البعض من قلة الثقة بالنفس نتيجة اتجاة الزوج لعلاقات غرامية مع أخريات اتجهوا إلى الملابس الملفتة جدا محاولة منهم لإثبات ثقتها بنفسها . والبعض الاخر قليل الإيمان اتجهوا إلى عمل علاقات غرامية مع رجال آخرين .
فى جميع الحالات كبت المرأة أثر على علاقتها باولادها وأثر كتير على أخلاقيات الأولاد وبالطبع أخلاقيات المجتمع .
استقيموا يرحمكم الله واتقوا الله فى زوجاتكم واولادكم .