أكد الإعلامي عمرو أديب، أن دبي ستبدأ في فتح المحال التجارية ولكن بإجراءات احترازية شديدة، وقال: "دبي وأبو ظبي هيفتحوا المولات بكرة، بس الأطفال لحد سن معين ووقت معين مش هتدخل، الكبار اللي فوق الـ60 سنة مش هتدخل، ومش هينفع تدخل المول أو المحل من غير كمامة وقفازات، وعلى فكرة كل الدواء اللي اتكلمنا عليه في علاج كورونا مطلعش بينفع".
وأضاف عمرو أديب: "انهاردة بيتكلموا عن طبيب مصري كبير في بريطانيا توفي بسبب كورونا، وطبيب تاني في مصر توفى بسبب كورونا، الناس دي بتتعب أوي يا جماعة، انهاردة اتوقف طبيب مصري في أحد مستشفيات العزل في مصر عن العمل لأنه تم تصويره وهو يرقص مع فريق العمل، إزاي يتوقف وهو بقى عايش حياته في مستشفى العزل الصحي في الصعيد، هي دي الطريقة اللي بنعامل بيها الدكاترة بتوعنا؟، أنا معرفوش لكن الراجل فرحان إن الناس اتعالجت تقوم توقفه؟، اغفرله باللي قدمه".
وقال عمرو أديب: "تعالي كده اقنعك تدخل مستشفى من دول، وربنا ما هترضى، إنما الناس دي بتجيلهم ناس عندها فيروس كورونا شديد الخطورة وبيتعامل وبيعالج ويهزر ويرفع روحهم المعنوية وإحنا مش حاسيين، والناس يتاعت السوشيال ميديا بتقول إزاي مش لابس كمامة، يا عم هو عارف إجراءاته لأنه دكتور وبيتعامل مع حالات".