علق الإعلامي عمرو أديب على وضع الأسواق المصرية وبالتحديد الأسواق البسيطة التي تباع فيها الخضر واللحوم، وقال: "اللي إحنا فيه ده دلوقتي فرصة مهمة للغاية عشان ناخد بالنا من الأسواق، لأن لحد دلوقتي لو دخلنا أي سوق هنلاحظ أن الموضوع عشوائي أوي، التطهير اللي بتعمله الحكومة دلوقتي في الأسواق ده عظيم، لكن الحقيقة المنظر اللي بنشوفه ده صعب أوي".
وأضاف عمرو أديب، خلال برنامج الحكاية: "اللي قبل الكورونا حمادة واللي بعد الكورونا حمادة تاني خالص، أنا مبقولش نقطع أرزاق الناس، أنا بقول إننا نطور من شكلها ونغير فيه كتير لأن الوضع حاليا بقى مختلف خالص، ودول مش سوبر ماركت كبير، دي ناس ليها أسواقها وعاداتها في البيع والشراء، ولازم كلنا نفتكر كورونا ظهر منين، ظهر من سوق عشوائي في الصين، ومحدش فينا هينسى بائعة الجمبري اللي نقلت فيروس كورونا للعالم كله".
وقال عمرو أديب: "أنفلونزا الخنازير جت من حيوان في السوق، أنفلونزا الطيور ظهرت بسبب حيوانات في السوق، وغيره من الأمراض اللي انتشرت في العالم كله، هذه السيدة الفاضلة اللي بتبيع جبنة قريش وبيض وزبدة فلاحي وفطير، لازم نوفر لها مكان مناسب، إحنا عاوزين الأمور تكون صحية ونظيفة".