علق الإعلامى عمرو أديب، على تأييد دول ومؤسسات دولية لإعلان القاهرة المتعلق بالهدنة في ليبيا ووقف القتال، قائلا: "العالم كله في اليومين اللي فاتوا كلموا الرئيس عبد الفتاح السيسي ودعموا المبادرة المصرية للتهدئة في ليبيا، وأنا عن نفسي شايفها مبادرة شافية ومتكاملة للوضع في ليبيا، ويبدو أن المبادرة دي هتكون حجر الزاوية لو الموضوع ده كله دخل في مجلس الأمن وبدأت مناقشته".
وأضاف الإعلامي عمرو أديب، خلال برنامج "الحكاية": "المبادرة شملت كل حاجة، التعامل مع القبائل وتقسيم المناصب، ووقف إطلاق النار، وكل حاجة، الإدارة المصرية وضعت مجهودا كبيرا لإخراج المبادرة دي، النهاردة عندما تجد الكرملين نفسه جاي يقولك المبادرة دي فيها شمول، ألمانيا نفس القصة، فرنسا وإيطاليا وأمريكا وغيرهم، الناس دي كلها شافت المبادرة مناسبة ومهمة لوقف الصراع هناك".
وقال عمرو أديب: أردوغان عاوز يطلع المشير حفتر من المعادلة تماما، وطلع بنفسه قال مش هنهدى قبل ما ندخل الجفرة، الأتراك واضحين جدا، عاوزين ياخدوا البترول اللي في منطقة الهلال النفطي، والغاز اللي في البحر المتوسط، إنما بالنسبة لمصر الموضوع مختلف جدا، إحنا بندور على أمن قومي وحدود محتاجة تتأمن، وأردوغان والسراج عمرهم ما هيقعدوا على ترابيزة المفاوضات".
وأضاف: "الجيش المصري والقوات المسلحة المصرية لا تدخل اشتباكات إلا إذا كان هناك خطر مباشر يحيط بمصر، ودلوقتي في قنوات الإخوان بيقولوا أن الجيش هيدخل ليبيا وهيحصل فيه زي ما حصل في 1967، وطبعا هما بيفكروا غلط ومش فاهمين أي حاجة".