علق الإعلامى عمرو أديب على فيديو متداول لعريس وعروسة أقاما عرسهما على "لودر"، وقال: "الناس عملت ابتكار فى مخالفة القواعد، عملوا فرحهم على لودر، العريس والعروسة فوق، وتحت منهم الناس ماشية بالزفة معجنة، أهم حاجة عندهم ما شاء الله سلامة العريس والعروسة ومحدش في المعازيم لابس أى كمامات، ومش عارف الطفل اللى معاهم ده بيعمل إيه".
وأضاف الإعلامي عمرو أديب، خلال برنامج "الحكاية" الذي يذاع على قناة mbc مصر: "أنا مش عارف الناس دي إزاي بتعمل كدة، الناس دي ممكن تتزحلق وتقع تموت سواء العروسة أو العريس، الناس فاهمة التباعد الاجتماعي غلط، ده مش منطقي يا جماعة، إيه الابتكار والإبداع اللي بتعملوه اليومين دول، إيه لازمة المصاريف دي كلها، وليه نعمل كده في الأيام الصعبة دي؟".
وقال: "عدينا كل المراحل بصراحة، والمفروض الراجل صاحب اللودر ده يتعاقب لأنه مش المفروض يعمل كدة، الناس دي كلها هيجيلها كورونا، وييجوا يقولوا مش لاقيين مكان الحقونا يا حكومة وأنقذونا من الفيروس القاتل، رغم أنهم بيقتلوا نفسهم بالتجمعات دى".