كشفت الفنانة نورهان، عن السر حول ثبات ملامحها، قائلة: "الحمد لله، أنا معرفش إيه السر، أزعم إني قدرت أقاوم إغراء عمليات التجميل، وترندات اللوك، والحاجات اللي تتنفخ والحاجات اللي بتتشد، وشايفة اللي ربنا اختارهولي أفضل شيء".
وأضافت خلال لقائها ببرنامج "اسألني"، عبر صفحة "سي بي سي"، على فيسبوك: "لو هغير حاجة في شكلي، مش في حاجة خلقها ربنا، لو أملك من الشجاعة هلبس ألوان تجنن كل يوم في كل وقت بحب الألوان جدا".
وتابعت الفنانة نورهان: "اتقالي شبه زبيدة ثروت ومريم فخر الدين، وأحيانا سعاد حسني، لكن ربنا بيخلق كل بين آدم له بصمة"، موضحة أن الجميع يعرف سنها الحقيقي، ومنشور على الإنترنت.
ولفتت إلى أنها ترى أن أيقونة الجمال المصري من الفنانات، سعاد حسني، مردفة: " بخاف من المفاجآت ومش بحبها، مبحبش الحيوانات الأليفة".
وأردفت: "أنا البنت الوحيدة وكنت متدلعة، وأحب أربي ابني على البر والعطاء، وبعد ما جه ابني معاذ، أصبحت بفكر في نفسي أخر حاجة، وهو بيحب التمثيل بس مش هوافقه"، مستطردة: "لو حد شتمني على السوشيال ميديا هوقفه عند حده، ولو تمادى هعمله بلوك، وبحب اسم الدلع ناني من صاحباتي".