قال المهندس سامح يوسف إدريس، نجل الاديب الكبير يوسف إدريس: عن رواية سره الباتع كتبها والدى وهو عنده 31 سنة، وأى شعب أو مجتمع محتاج بطولة تحفزه على العمل وكل واحد فينا عنده سره الباتع وهو في الأصل ريفى فلاح وهو كان متخيل ان في فلاح بطل ومؤمن انه هو الفلاح ده، وده سره الباتع.
وأضاف خلال لقائه ببرنامج التاسعة المذاع مع الإعلامية شافكى المنيرى: خالد يوسف عاشق لهذه القصة اشتراها قبل كده وعاوزين نوضح ان الفكر لا يباع والناس بتاخد حق الأداء العلنى له لمدة 5 سنوات وهو ما كانش عارف هيعمل بيه، وهو اشتراه قبل 5 سنوات واشتراه تانى وعمل المسلسل واحنا كنا فاكرينه بتاع أفلام بس وهو حط في العقد انه يمكنه استغلاله في كل الاعمال الفنية المتاحة وكان في شرط انه المعالجة الدرامية لابد من موافقة الاسرة عليها حتى لا يشوه المسلسل وانا شايف انه ماشى كويس ولا يمكن الحكم عليه إلا بعد انتهاء المسلسل .
وتابع: والدى كان معروف من الفئة المثقفة، وجزء كبير من عامة الشعب لان في جزء كبير من مقرر الثانوى الناس بتدرسه لكن انه يدخل البيوت من خلال التليفزيون الناس بقت تعرفنى وحسيت ان والدى بعد وفاته الناس هتدرك أهمية اعماله وكتاباته الأدبية، ولابد ان يفرق المشاهد انه يشاهد عمل درامى وليس سردا للتاريخ والعمل الدرامى له رؤية فنية مختلفة عن الحقيقة، وهو خلق الخيال بالحقيقة بالخرافة وأجمل ما فيه هو انه يحيى الوطنية فينا والشخصيات أراها رائعة ولكن بعض الشخصيات تثير بعض الجدل واعتقد أنه متعمد ليزيد من نسب المشاهدة ، في مسلسلات كثيرة مميزة مثل رسالة الإمام والناس بس بتخلط الاشياء .