نهى العمروسي توضح سبب اعتزال شيرين: اتجرحت آلاف المرات لأننا عايشين في "باكبورتات"

علقت الفنانة نهى العمروسي على اعتزال النجمة شيرين عبدالوهاب الغناء، وقالت إن ذلك يأتي بسبب أننا نعيش في مجتمع يعاني من انتشار القذارة والانحطاط.



وكتبت نهى عبر صفحتها بموقع فيس بوك: الأسطورة شيرين عبدالوهاب، تفتكروا إيه إللى خللى واحدة بحجم موهوبتها تقرر تعتزل ؟ واحدة فى عز شبابها و قاعدة ومرَبُعة فى قلوب الملايين، وعلى قمة هرم النجومية و النجاح !!! أنا أظن إن إحنا إللى طفشناها، أيوة الجمهور هو إللى طفشها، لأنها ست عبارة عن كتلة أحاسيس، وإحنا بقينا مجتمع مريض بكل المقاييس، و مش محتاجة أثبت رأيي، لو حد قرأ كومنتات البشر اللى على الفيسبوك على أى حد هيتأكد إنى مش غلطانة و خصوصاً بأة التعليقات اللى على الفنانين، تعليقات فى منتهى القذارة و الانحطاط تدل على إننا فى مجتمع مظلم، متخلف و تحسسك إنك مزنوق فى ركن قذر من العالم، بالبلدى كدة إحنا عايشين فى باكابورت.

وأضافت نهى العمروسى: أظن إن شيرين أحاسيسها اتجرحت مش مرة و لا اتنين و لا 100 حتى، أكيد شيرين اتجرحت آلاف المرات، أكيد حست إن روحها الحرة اتحبست فى سجون الرجعية و العفن، أكيد أحست بالخطر على حريتها و أحست بالقرف و الاشمئزاز من إللى حواليها، أحست إن المجتمع العجوز دة بيحاول يسرق روحها الشابة منها فقررت تنقذها من الهوا الملوث ده وتشممها هوا نضيف.

مجتمع كذاب مليان أقنعة ما فيش مكان فيه للصادقين، بيحاول يرغمها على إنها تبأة زيه وهي مش ممكن تتخلى عن صدقها، قلبى معاكى يا شيرين لأنى متأكدة إنك خدتى قرارك دة وانتى مضطرة ليه و قلبك بيتقطع من اليأس و الحزن والإحباط .