روى عدلى القيعى مدير التعاقدات والتسويق السابق بالنادى الأهلى، قصة التعاقد مع طاهر الشيخ عضو مجلس إدارة النادى الأهلى ولاعب النادى الأولمبى والأهلى ونجم منتخب مصر فى السبعينات، وكيفية التعاقد معه من كندا وضمه لصفوف القلعة الحمراء.
قال القيعى لبرنامج "بجراءة" الذى يقدمه الإعلامى كرم كردى، عبر شاشة "النهار رياضة": "طاهر الشيخ كان عنده 19 سنة وشكله برنس كده ولاعب مهارى، وطلبنا التعاقد معها، وبعد ما ناديه وافق طاهر سافر كندا وأتجوز أخت زوجة أخويا، وقعد هناك وقالى زوجتى مش حابة ترجع مصر تانى وهنستقر فى كندا، فقلت هسافر أجيبه واجى، الفريق مرتجى قال لى لا مش هقدر أغامر بفلوس النادى".
أضاف القيعى: "قولت للفريق مرتجى هسافر على حسابى والإقامة هتكون عند أخويا ومش هنكلف النادى حاجة، ولو جبت طاهر ابقى ادينى ثمن التذكرة، وبالفعل حجزت تذكرة بـ 308 جنيهات، وكان لابد أن تقيم فى كندا 4 أسابيع مقدرش ارجع قبل 4 اسابيع، ودخلت فى مفاوضات مع طاهر وقولتله الأهلى بنى فريق قوى والدورى بدأ، وخلال الأربع اسابيع خاض تدريبات شاقة على جبل مونتريال، بالاضافة إلى خوض عدد من المباريات مع لاعبى الجامعات، وفعلاً خلصت المدة وجبته ورجعت فى رحلة استغرقت 30 ساعة".
تابع القيعى: "فور وصول مصر طلب طاهر زيارة أسرته فى الإسكندرية، قولت له مستحيل أسيبك من ايدى أنا سفرت اجيبك من كندا ومش هسيبك غير لما الكارنيه بتاعك يطلع، فطلب زيارة أخته فى القاهرة وكانت رجلى على رجله، والمفاجأة أنه راح اتمرن الجمعة والسبت هيديكوتى لاقاه 60% جاهز، فلعبه ماتش أمام كفر الشيخ فى مختار التتش وطاهر جاب هدفين فى الشوط الأول، راح ساحبه، بعد ما قدمه تقديمة كويسة للجمهور، لتبدأ مسيرة البرنس مع الأهلى".