نعناع الـ"جنينه"

سيناريو تخيلي مالوش أي أساس من الصحة..

:ألو.. مساء الخير يا فندم

:أهلا أهلا مساء النور

:أخبار سعادتك أيه

:كله تمام.. بالمناسبة تسلم ايديك

:على أيه بس يا فندم.. احنا تلاميذك

:لأ بجد فعلا ضربة معلم.. أخيرا خلصنا منه

:يا فندم هو اللي لف الحبل حوالين رقبته

:صدقني حاولنا كتير نقوله يستقيل من نفسه.. بس ما رضيش.. هنعمل له أيه بقى

:ما هو برضو يا فندم.. ما ينفعش يفضل واقف لنا زي اللقمة في الزور

:على رأيك.. أهو لف الحبل حوالين رقبته بنفسه.. بس برضو دي فكرتك أنت.. فاكر؟
:أه طبعا.. هو يوم ما طلع البيان بتاع الفساد وقال دول 600 مليار جنيه وقلب علينا الدنيا وطبعا الميليشيات إياها لعبت صح بالكلام بتاعه.

:ما هو ده بقى الحبل.. انت يومها قلت ازاي يعني 600 مليار.. ودورت وبحثت لحد ما اكتشفت أن الباشا جامع كل تقارير السنين اللي فاتت مع بعض.

:وهي دي الغلطة يا فندم اللي وقع منها.. قولنا له اثبت وورينا الورق والمستندات.. بس طبعا ما فيش
:وعشان كده احنا تحركنا كويس لأنه فعلا عمل لنا أزمة كبيرة قوي بتصريحاته دي.. خصوصا أن منصبه حساس جدا وأي كلام يطلع منه لازم يكون موزون ومتوثق.

:اللي حواليه يا فندم ضيعوه.. قالوا له ما حدش هيقدر ييجي جنبك.. أنت ضد العزل
:أه ضد العزل.. بس مش معنى كده أنه يشوش على بلده بأرقام وكلام ما حصلش.. صحيح فيه فساد أه.. لكن مش كده يعني.. مش بالأرقام دي كلها.

:خلاص يا فندم.. أهو كده انتهى وطلع القرار والعدل ياخد مجراه بقى
:بالظبط كده.. احنا في دولة قانون.. والقانون هو اللي هيحاكمه.. احنا عملنا اللي علينا وخلاص
:صح كده يا فندم.

:بس تفتكر الموضوع هيعدي.. الميليشيات إياها والقنوات بتاعتهم شغالة بشراسة كبيرة.. وبيتهمونا اتهامات بالتلفيق
:يا فندم ما تنساش أن الراجل مش قليل ومنصبه مش هين.. وهم بيعتبروه آخر حاجة فاضلة لهم من السنة السودا اللي مسكوا فيها البلد.. طبيعي ما يسكتوش..

:طب هنعمل أيه.. نرد عليهم بنفس الطريقة

:لا يا فندم.. أنا شايف نردم الموضوع كله

:نردمه.. نردمه ازاي يعني

:نخلي العيون كلها تروح في اتجاه تاني خالص..

:أه بس خلي بالك.. لسه موضوع "ريجيني" ما عداش والسيناريو بتاعه ما حدش هاضمه

:يا فندم أنا كنت ضد السيناريو ده من الأول واعترضت عليه.. وقلت يومها سيبوا الموضوع يمشي في اجراءاته.. بس حكاية

البرلمان الأوروبي دي هي اللي خلت زمايلنا يسرعوا في عمليتهم عشان ينفوا التهمة عن نفسهم

:ويا ريتها نفعت.. لبست فيهم أكتر.. المهم قولي هتخلي العيون تروح اتجاه تاني ازاي

:ما تقلقش يا فندم.. مصر دايما "ولادة" بالأحداث.. نام حضرتك دلوقتي.. وبكرة الصبح يحلها ألف حلال

:طيب تمام.. تصبح على خير

:وحضرتك من أهله يا فندم

عاجل: اختطاف طائرة مصرية من مطار برج العرب إلى قبرص

:ألو.. أيه حكاية الطيارة دي.. هو ده الاتجاه التاني

:لا والله يا فندم خالص.. بس زي ما قلت لك بليل.. مصر ولادة.. وأهي ولدت حدث..
:هههههههه.. طيب يا سيدي.. ماشي.. خلينا نشوف
:هتشوف يا فندم.. هتشوف!!!!