أنا مستعد
رفعت صوتى فى الشوارع والنجوع
هتفت حقى عيش كرامة مش خضوع
يا خبزا خيرك من زمان
يا شربه مُر من الكيعان
يا قلب عمران بالخشوع
مش راح نجوع...
قدمت عينى فى سكِتك
وعرفت مين قام سَكتك
وعرفت مين يهوى الخنوع
لا للرجوع...
أنا دم اخويا بين ايديا
أُدام عينيه
عمال يسيل
أنا دم اخويا ساب دليل
رحته الزكية
ساكنةالقميص
انا دم اخويا مش رخيص
دا دمه نار بين الضلوع
طب ليه الرجوع؟!
يا ثورة عايشة مستمرة
دا انا كل مرة
بدفن شهيد من غير دموع
و بضحكة مُرة
واقف مع اصحابى جموع
على باب صوان
واقفين نصلى بدون ركوع
جوه الميدان
واقفين نصلى بالشموع
سامعين أذان...
مهما الطريق هيكون طويل
مليان بشوك
راجع بشوق فى ايدين دليل
عمره ما داق طعم الخضوع
او كان ذليل
لمستبد
مفيش رجوع
لإدين تهد...
صوتى هيخرج م الحيطان
من كل سور
صوتى هيخرج من السطور
من كل حر جرئ وند
حالف لأخد بالقصاص
من كل زور
وبصدر مفتوح للرصاص
من غير دروع
من غير دروع
أنا مستعد